Meztga: Duvrar l'entir animal

Mangiadas vegnan ozendi mo anc las «bunas» parts d’in animal: filet, cotletta e costas. Parts innoblas sco cor, gnirunchel, magun, lom, tscharvè, testicul, cua, toppa, sang etc. vegnan savens duvradas per autras chaussas sco schelatina, producziun da grass, per pavel, cosmetica e medischina. Curt - memia pauca charn da l'animal vegn nizzegiada per mangiar. Questas reproschas fan almain la glieud dal moviment «Nose to Tail» - dal nas a la cua.

Per pudair confermar questa accusaziun envers l’industria da charn ed ils consuments da quella avain nus visità in mazler en il Grischun Central. Pietro Peduzzi, che maina ses affar da famiglia a Savognin gia dapi decennis, ha ina resposta sin la dumonda, sche mo la meglra charn vegn mangiada. Tuttas parts d’in animal hajan lur niz, ed uschia na pon ins era betg dir ch'il dadens na vegnia betg duvrà. Quai saja mo la mesa vardad.

Svilup

Vid ils crutschs pendan gianoschas, lieungas e cuas.

Fullscreen

Per l'ina saja la societad sa sviluppada en ina societad che decida savens mo anc per la meglra tocca sco filet, steak u cotletta. Tranter auter perquai che la glieud haja cumpareglià cun pli baud dapli daners. In’autra raschun è tenor Peduzzi era la sturnadad bovina BSE ils onns 90 ch’ha sfurzà la confederaziun da scumandar la vendita dad adina dapli parts dal muvel. Uschia per exempel tscharvè ed egls, pli tard lura era cua dad animals d’ina tscherta vegliadetgna, magugl da dies e spletga.

Il mazler da Savognin è da l’avis che la glieud haja pensà, sch’i na saja betg bun da mangiar il tscharvè dal bov, lura na possia ins era betg mangiar quel dal portg. Quai pudess esser in motiv pertge ch’il dadens na vegn betg mangià uschè savens. L’interess pli pitschen per charn betg uschè nobla ha era el sentì.

Vid ils crutschs pendan gianoschas, lieungas e cuas.

Serrar

Interess

E tuttina datti anc la glieud che cumpra e cuschina gugent talas parts. Persunas ch’han gugent la cuschina tradiziunala e che vulan restar fidaivels a la moda e maniera da cuschinar da lur geniturs, tats ed antenats. Ed uschia po la mazlaria Peduzzi era anc oz vender toppas ed il dadens.

Che l’interess è grond ves’ins era adina puspè a la «batgareia» che la mazlaria organisescha mintg’onn. Per questa giada, mez november, èn vegnidas spetgadas passa 700 persunas. Sin la carta da tratgas stattan sper salsizs, gulasch e costas tranter auter era sang cuschinà, lieunga da bov e toppas cun ventrigl dal portg. Ils giasts n’èn betg mo indigens, mabain era internaziunals.

Scumond

Ma era cun vender tals products, na vegn ins betg a duvrar mintga toc da l’animal. Differentas parts èn tenor perscripziun scumandadas per la vendita, sco per exempel il tscharvè, magugl dal dies u la spletga d'insaquants animals.

Quellas parts vegnan confiscadas ed tramessas a Bazenheid en il chantun da Son Gagl, nua che quellas vegnan elavuradas en farina da charn. Tenor Peduzzi era quai auter pli baud.

Coier

Tar tut quella charn che nus avain gia numnà, na savain nus anc adina betg tge che charn ch'il mazler mangia il pli gugent...


                        «Sche jau avess da ma decider, alura schess jau charn da coier. En emprima lingia è’la buna, ed en segunda lingia stas ti meglier, ti digereschas pli bain».

- Pietro Peduzzi

Nose to Tail

Fullscreen

«Nose to Tail» – in trend u mo glieud che sa lamenta?
Ok, nus n'avain betg retschertgà tras tuttas mazlarias ch'i dat insumma, ma quai n'era er betg noss'intenziun. Nus avain vulì savair, sche mo anc la charn nobla vegn vendida e consumada. E questa dumonda è vegnida sclerida: La charn innobla na vegn betg mo manizzada e stuppada en beglia u schizunt en paletschas da liongia sinteticas.
I dat tuttina anc consuments che mangian gugent in toc charn ch'era ì en emblidanza.

Sco che Peduzzi di, animeschian ils appels da «Nose to Tail» la glieud da cumprar dapli da tals tocs. Almain per in curt mument.

E forsa èsi propi ina giada da cumprar insatge auter che mo il filet.