Emprender rumantsch sco...Il chantun Grischun ha radund 198'000 abitantas ed abitants. Dentant n'èn betg tuts naschids qua, blers vegnan dalunsch davent. Per sa sentir da chasa, pudair s'integrar, è la lingua la clav. RTR ha tschertgà persunas – da l'Italia, dals Stadis Unids, dal Portugal, da la Spagna, da l'Ollanda ed ha visualisà lur istorgias. Ellas ed els han tuts insatge communabel – la lingua rumantscha. Dentant è mintgin e mintgina ida l'atgna via.
Sche Vus enconuschais insatgi che na sa anc betg rumantsch, u avais sezs interess d'emprender – qua chattais las intervistas, nua che noss protagonists e nossas protagonistas han raquintà da las sfidas e dals avantatgs durant emprender e differenzas e sumeglianzas cun l'atgna cultura. Nua ch'ellas ed els han partì lur tipps e trics per emprender – tut quai en lur lingua materna!
Ils videos per guardar, tadlar e cundivider chattais Vus sin nossa pagina rtr.ch
sco era sin youtube, cun suttitels en diversas linguas.
Robert
Robert, renumà cumponist e musicist, è naschì, creschì si ed ha studegià en ils Stadis Unids, el e vegnì en Svizra anc sco student. El era immediat inspirà da la natira, lingua e musica da l’Engiadina.
Marcella
Marcella è creschida si a Roma ed ha studegià a Florenz. Il 1979 è ella vegnida en Svizra. Marcella ha fatg pliras translaziuns litteraras dal rumantsch en talian.
Agustin e famiglia
Agustin Manuel, Yolanda e lur uffants, Agustin e Luana, da Fisterra (Spagna) stattan dapi circa 10 onns a Trun. Lur lingua materna è galizian.
Melanie
Oriund da las inslas Moluccas, è Melanie creschida si en l’Ollanda. Anc sco giuvna è ella vegnida en Svizra per lavurar, e nunspetgadamain, restada en il Grischun.
Sandra-Sofia
La famiglia da Sandra-Sofia vegn dal Portugal. Sandra è naschida en Svizra, dentant gia sco uffant ida enavos en il Portugal. Suenter il studi ha ella decis da turnar en il Grischun.
Henning
In programmader oriund da la Svezia è Henning avant onns vegnì en Svizra pervia da sia lavur.
Grazia a sia fascinaziun per linguas ha el emprendì rumantsch, malgrà ch’el stat en Turgovia.
Emprender rumantsch sco...