Ignaz Derungs e ses agid per l’Ucraina
Dapi prest tschintg onns rimna Ignaz Derungs da Tavanasa rauba d’agid per l’Ucraina. Quai che ha cumenzà cun ina sentupada spontana è daventà in engaschament che na lascha betg pli liber el.
Da Tavanasa vers l’Ucraina
Pneus, vestgadira, material medicinal, maschinas u schizunt autos: Ignaz e ses voluntaris rimnan quai che vegn duvrà. Impurtant è surtut: la rauba sto arrivar là, nua ch’ella fa propi da basegn.
2'700 kilometers fin a Kharkiv Il viadi maina da Tavanasa sur 2'700 kilometers fin a Kharkiv. Gia curt suenter il cunfin èn ils fastizs da la guerra omnipreschents. Qua daventa visibel quai che las novitads pon mo mussar a distanza.
Agid che arriva
A Kharkiv è Viktor Ymelianenko cun sia organisaziun Misto Dobra in dals partenaris ils pli impurtants.
El reparta la rauba che arriva da la Svizra e da la Pologna a persunas che la dovran urgentamain.
Ils pneus da Tavanasa
Sin las vias plain stgaglias da granatas èn pneus ina rauba preziusa. Quels che vegnan rimnads a Tavanasa vegnan duvrads savens gia paucs dis suenter lur arrivada – oravant tut per vehichels ch'èn en acziun a la front.
Ina nova funcziun tranter las ruinas
Nua ch’ina fabrica da mobiglias è vegnida destruida, nascha insatge nov. Maschinas d’ina scrinaria da Rueras vegnan restauradas e duvradas da veterans ucranais.
Sin la fugia cun in sac da plastic
Milliuns han stuì bandunar lur dachasa. En in center per fugitivs a Kharkiv arrivan famiglias, persunas veglias, blessads e traumatisads – savens cun pauc dapli che quai ch’ellas pon purtar.
Tut ha cumenzà sin la punt
Sin la punt da Tavanasa ha Ignaz inscuntrà casualmain la famiglia Kozak da Kiev, a la tschertga d'in nov dachasa en Svizra. Da quest inscunter è naschida in’idea – ed or da quella idea èn daventads passa 40 transports cun tschients tonnas material d’agid.
Enavos a Kiev
Suenter passa in onn en Svizra è la scolasta Kateryna Kozak turnada cun ses uffants e sia mamma en l’Ucraina. Ella vuleva turnar en sia patria, enavos tar ses scolars e sias scolaras. Il contact cun Ignaz è restà – era durant las attatgas e las notgs en ils bunkers da la metro da Kiev.